Kwa mujibu wa ripoti ya Idara ya Tarjama ya Shirika la Habari la Hawza, Hujjatul-Islam wal-Muslimin Sayyid Sajid Ali Naqwi, Rais wa Baraza la Wanazuoni wa Kishia Pakistan, katika mnasaba wa “Siku ya Kimataifa ya Mshikamano na Watu wa Palestina”, alisisitiza katika hotuba yake umuhimu wa msaada wa vitendo kutoka kwa ulimwengu wa Kiislamu kwa watu madhulumu wa Palestina. Alikumbusha kuwa tangu mwaka 1977, tarehe 29 Novemba ya kila mwaka, kwa mujibu wa azimio la Baraza Kuu la Umoja wa Mataifa, huadhimishwa kama Siku ya Kimataifa ya Mshikamano na Watu wa Palestina ili kusisitiza haki yao ya kujitawala na ya uhuru; hata hivyo, kwa masikitiko makubwa, jumuiya ya kimataifa hadi leo imeendelea kushindwa na kuonekana haina uwezo wa kutatua suala la Palestina.
Katika kuendelea na hotuba yake, akirejelea dhuluma na mateso endelevu ya utawala wa Kizayuni pamoja na uungaji mkono wa madola ya kibeberu kwa utawala huo, alisema: Kwa kipindi cha miaka 78 iliyopita, watu wa Palestina wamekuwa chini ya dhuluma na ukandamizaji wa Wazayuni, na ubeberu wa dunia kwa mipango ya kimfumo na iliyoratibiwa, umewafukuza Wapalestina kutoka katika ardhi yao na kuimarisha utawala haramu wa Kizayuni.
Mwanazuoni huyu mashuhuri wa Pakistan aliongeza kuwa: Wakati ubinadamu katika maeneo ya Ghaza na Mashariki ya Kati uko katika mateso makubwa, mashambulizi na dhuluma dhidi ya watoto, wanawake, wazee na vijana wa Palestina yanaendelea, na Israel katika jambo hili imevunja mipaka yote ya kibinadamu. Sasa ni wakati wa nchi za Kiislamu kuungana si kwa maneno tu, bali kwa vitendo, na kusimama kwa uthabiti dhidi ya dhuluma za Wazayuni na ubeberu wa dunia, na kuchukua hatua madhubuti za kumaliza mateso yanayowakumba watu wa Palestina.
Mwisho wa hotuba yake, kwa kusisitiza msimamo wake wa kudumu pamoja na wa jumuiya ya Waislamu wa Kishia kuhusu haki za watu wa Palestina, alisema: “Kuanzia siku ya kwanza hadi leo, tumesimama pamoja na watu wa Palestina, na sambamba na kulaani vikali ubeberu na dhuluma za Wazayuni, tunasisitiza kwamba hadi pale suala la Palestina litakapotatuliwa kwa mujibu wa matakwa na malengo ya watu wa Palestina wenyewe, kuanzishwa kwa amani ya kudumu katika eneo hili hakuwezekani.”
Maoni yako